早幾日，港澳辦主任張曉明就喺「香港當前局勢座談會」上引述已故領導人鄧小平1984年同1987年嘅講法，就話香港如果發生動亂，中央就會干預。究竟當年鄧小平响咩情況下講咗相關言論？阿史今日就同大家回顧吓。

話說喺1984年，當時北京正舉行「兩會」，香港傳媒都好關心中央對香港嘅立場同決定，其中一位領導層對談判了解唔多，被記者問多兩問講咗句「也可以不駐軍」。鄧小平喺5月25日出席完第六屆人大第二次會議閉幕大會之後，向記者表示嗰位領導嘅說話唔啱，鄧小平講明中國恢復對香港主權之後，中國有權喺香港駐軍，係維護中華人民共和國領土主權、國家主權嘅象徵，係香港穩定同繁榮嘅保證。鄧小平仲話，香港係中國領土，反問點解唔可以駐軍，被媒體形容為就駐軍一事「大發雷霆」。另外，喺《鄧小平文選》第三卷嘅〈鄧小平論述香港一國兩制〉亦都提到，駐軍亦有防止動亂嘅作用，當啲想搞動亂嘅人知道香港有軍隊，就會作出考慮，就算有動亂都可以及時解決。

至於1987年，鄧小平會見香港基本法起草委員會委員發表講話，提到基本法，仲講到如果香港變成一個喺「民主」幌子下反對大陸嘅基地，就一定會干預，但首先會係香港行政機關干預，唔一定要大陸駐軍出動，當發生動亂、大動亂，駐軍先至會出動。

圖為鄧小平1992年响深圳眺望香港，取自網絡。